Fokustyd – week 3: Gebed
Gesprek is nodig vir enige verhouding om te groei. Ook vir ons verhouding met God. ‘n Egpaar wat nie met mekaar praat nie sal ‘n swak en verbrokkelende verhouding hê. Ons hoor God in Sy Woord en om tot God te bid is om terug te kommunikeer. Gebed is daarom om God self teë te kom. Gebed is nie net om God vir dinge te vra nie. Ons sien selfs hoe Jesus gereeld weg van die skare tyd alleen spandeer saam met Sy Vader in gebed. Miskien is dit die beginpunt vir ons in die herstel van ons gebedslewe. Om doelbewus tyd alleen te spandeer sonder selfone, tv’s, radio’s, musiek of ander mense. Bid hardop, dit kan jou help om jou aandag te fokus. Hou ‘n gebedslys. Bid saam met ander. Iemand het eenkeer gesê: “Ons behoort die verstomming te ken om sy heerlikheid te prys, die teerheid te beleef as ons sy genade weer sien, en die stryd om afhanklik sy hulp te vra – al hierdie dinge kan daartoe lei dat ons die werklikheid van sy teenwoordigheid ken.”