Nuwe studente vir BTh via Docenda

Docenda beplan om volgende jaar met ‘n tweede groep teologiese studente te begin in ons gemeente en ook om ‘n bykomende fasiliteerder aan te stel.   Die minimumvereistes is Matrikulasievrystelling met ʼn APS-telling van 24 vir matrikulante en as die aansoeker ouer as 23 jaar is, kan voorwaardelike vrystelling gegee word   totdat die persoon die eerste jaar slaag en aansoekers ouer as 45 jaar verkry volle vrystelling.  Die gewone BTh “Oop” program kan deur enigeen (uit enige denominasie) geneem  word.  Dit is ʼn 3 jaar graadkursus wat oor 4 jaar  versprei word vir deeltydse Docenda- studente. Beurse word deur Docenda beskikbaar gestel aan diegene wat daarvoor kwalifiseer.  Indien u belangstel, kontak asb vir ds Garrie, sel 084 581 3999 of e-pos hgschutte@gmail.com so gou moontlik.  Sluitingsdatum vir aansoeke is 30 September.

Alikreukelkuier

Wat ‘n heerlike begin vir 2016 was dit nie! Ons het lekker gelag oor die pappotte, ryspotjies, drukkokers, ens in die gemeente en elkeen het sy eie potjie gekies! Die gestoofde droë vrugte en joghurt het die weg gebaan vir heerlike hamburgers wat elkeen na eie smaak kon bou en daarna het ons éérs gekuier.  ‘n Spesiale welkom aan tannie Thea en nuwe intrekkers Lewies en Carina wat vir die eerste keer daar was.  Baie dankie aan die eienaars van Marlon Vakansieoord wat ons altyd…

Fokustyd, week 6 – Vrydag

Vrydag – Lewe in liefde en vrede v Romeine 14: 13-23 Waaroor gaan die Koninkryk van God uiteindelik? Gee nie om wat ons doen nie, ons is reeds verkeerd wanneer ons die vrede en vreugde wat die Gees van God ons gee laat los het. Elke persoon moet hul eie harte voor God ondersoek: “Is wat ek doen aangenaam vir God en dien dit sy doel?” Jou aktiwiteite behoort daarop gerig te wees om vrede te bewerk en mense op te bou in hulle vertroue in die voldoende werk van Christus (v19).

Besige naweek!

Wat ‘n heerlike naweek was dit nie!  Saterdag het ons die voorreg gehad om Roxanne so bietjie te bederf met ‘n babatee (wonder wie van sy of al die oumas  het dit die meeste geniet?).  Sondag is ons tydens die eerste diens opnuut daaraan herinner dat ons die geleenthede wat God op ons pad stuur om Sy Woord uit te dra moet raaksien en aangryp.  By die Informele diens het ons geleer hoe belangrik dit is om die regte keuses te maak en watter invloed verkeerde keuses…

Inligting vir vakansiegangers en swaeltjies

Ons wens alle besoekers en swaeltjies ‘n baie lekker rustydjie toe.  Net vir algemene inligting die volgende: *  Erediens, 09:00 *  Pannekoekbak by Margate Mardigrass – elke Woensdagaand van die vakansie.  Kom besoek ons gerus by ons stalletjie langs die Poskantoor. *  Swaeltjies – voltooi asb. die inligtingsvorm wat in die voorportaal beskikbaar is, sodat ons kan kontak hou terwyl julle hier by ons kuier. Lekker kuier!

Informele Diens, 21 Junie 2015

Almal word hartlik uitgenooi na ons informele diens op Sondag, 21 Junie 2015 om 10:30.  ‘n Sanggroepie olv Charmaine Wagenaar gaan die sangbegeleiding waarneem en ds Garrie gaan praat oor die kweek van goeie geloofsgewoontes.   Christene besit groot vryheid oor hoe ons ons dag kan inrig.  Ons het sekere beginsels waarvolgens ons leef, maar ons het nie ’n wettiese godsdiens wat ons hele lewe verslaaf nie.  Dit is ’n wonderlike voorreg, maar ook ’n groot uitdaging. Ons kan nou ons lewe tot ’n groot mate inrig volgens ons omstandighede.  Aan die ander kant kan ons maklik verval in ’n godsdiens wat nie gerugsteun word deur goeie gebruike nie.  Ons gebruike behoort ons te help sodat ons getrou ons geloof prakties kan uitleef.   Ons hele lewe is vol van gebruike en gewoontes.  Van die oggend dat ons opstaan tot selfs wanneer ons gaan slaap.   Goeie gewoontes, die manier hoe ons gewoond is om dinge te doen, bevorder alle fasette van ons lewe.  Gewoontes bepaal egter nie ons geloofslewe nie, maar ondersteun ons uitleef daarvan.  Daarom moet gewoontes verander wat ’n belemmering daarvan is of word.   Kweek goeie gewoontes.  Dit sal net ons verhouding met die Here en ons naaste verryk.  

Basaar, 30 Mei 2015

    Lus vir daardie spesiale tuisgebakte stukkie beskuit of ‘n vingerleklekker sosatie? Wat van basaarpoeding, pannekoek, vetkoek met maalvleis of ‘n heerlike stukkie koek? Op soek na ‘n winskopie boek of plant? Nou ja, dan is ons basaar volgende Saterdag net die ding.  Moet dit nie misloop nie! Ons skop reeds 8:00 af met ‘n heerlike boere-ontbyt: maalvleis, spek, eiers, tuisgebakte brood, ens.  Vir meer inligting kontak gerus vir Liana Schutte by sel 084 581 3809.  

Informele Diens, 10 Mei 2015

Dit is met dankbaarheid teenoor God dat ons kan berig dat ons informele bediening nou gegroei het tot ‘n volwaardige informele diens.  Die eerste diens vind DV op 10 Mei 2015 om 10:30 plaas.  Die tema is:  Hoe kry die duiwel vatkans op my lewe? Die duiwel is ’n werklikheid.  Hy is daarop uit om my as God se kind groot skade aan te doen.  Hy sal elke geleentheid met albei hande aangryp as hy ons kan beetkry. Ons word beskerm deur die Here.  Tog gee die Here vir ons vryheid om keuses te maak en daardie keuses in ons  lewens uit te voer.  As ons ongehoorsaam aan die Here raak, skep ons geleenthede, gee ons aan die duiwel  openinge om ons binne te val.  Hy lê elke dag en loer op ons soos ’n roofdier wat sy prooi bekruip.  Speel ons saam, storm hy,   oorweldig hy, beseer hy. In Efesiers 4: 27 word ons gewaarsku om nie vir die duiwel ’n houvas op ons lewe te gee nie.  Ons doen dit as ons iets in ons lewe ‘n “te” maak, ons daarmee oorboord gaan, dit wat eintlik geoorloof is, sonde te maak.  Die voorbeeld wat vir ons genoem word, is kwaadword.  Daar is niks mee fout om vir die regte redes kwaad te word nie, maar as dit oorgaan in haatdraendheid, vergelding, bitterheid, gevloek, geskel, ens. skep ons openinge vir die duiwel.  Ons maak onsmeer weerloos teen sy vyandige aanvalle.   Hy sal alles in sy vermoë doen om die slegte situasie verder te misbruik en  aan te blaas. Ons keer die duiwel se misbruik as ons aan onsself werk om nie tot die aand toe kwaad te bly nie.  Ons behoort alles in die stryd te werp dat iets, wat self nie sonde is nie, nie in ons lewe tot sonde ontwikkel nie.  Dan trek ons die nuwe mens aan wat in die lig lewe.

Informele Bediening

Wat het die “Noah”-fliek, die vraag of jy mag oordeel, die oerknal (big bang), ens. met mekaar in gemeen?  Dit is alles vrae wat vanuit die jongere geledere uit die gemeente gekom het en tydens die laaste klompie Informele Bedieningsgeleenthede aangespreek is.  Hierdie bediening is maar nog in sy kinderskoene en alhoewel die treë partykeer maar nog wankelrig is, kan ons net vir God prys vir sy seën op hierdie bediening.  Vir die huidige vind dit die 2e Sondag van elke maand plaas om 10:30.…